مولانافضل الرحمان کےعزائم سے پوری قوم باخبرہے،شوکت یوسفزئی

پشاور(الصفوت نیوز)وزیر اطلاعات خیبرپختونخوا شوکت یوسفزئی نے کہا ہے کہ مولانا فضل الرحمان کے لیے پی ٹی آئی کے کارکن ہی کافی ہیں، ہم چاہیں تو مولانا کو گھر سے بھی نہ نکلنے دیں۔
تفصیلات کے مطابق صوبائی وزیر شوکت یوسفزئی کا کہنا تھا کہ مولانا فضل الرحمان سیاست کریں غنڈہ گردی نہ کریں، انہوں نے خبردار کیا کہ حکومت توڑ پھوڑ اور سڑکیں بند کرنے کی اجازت نہیں دے گی۔انہوں نے کہا کہ مولانا کے لیے پی ٹی آئی کارکن ہی بہت ہیں، ہم چاہیں تو مولانا کو گھر سے بھی نہ نکلنے دیں۔
شوکت یوسفزئی نے بلاول بھٹو کو مشورہ دیتے ہوئے کہا کہ چیخنے کے بجائے تنظیم سازی پر توجہ دیں۔شانگلہ میں ہونے والے احتجاج پر شوکت یوسفزئی نے موقف دیتے ہوئے کہا کہ جے یو آئی ف اور ن لیگ کے رہنماؤں نے نعرے لگوائے، جنہوں نے نعرے لگوائے ان کو جانتے ہیں۔

واضح رہے کہ اپوزیشن جماعتوں کے حکومت مخالف احتجاجی مارچ کے لیے وزیراعظم کی ہدایت پر سینئر ارکان پر مشتمل کمیٹی تشکیل دے دی گئی ہے۔سات ارکان پر مشتمل کمیٹی کی سربراہی پرویز خٹک کریں گے، کمیٹی میں اسپیکر قومی اسمبلی اسد قیصر، چیئرمین سینیٹ صادق سنجرانی، شفقت محمود اور نور الحق قادری شامل ہیں۔ذرائع کا کہنا ہے کہ اسپیکر پنجاب اسمبلی پرویز الہٰی، اسد عمر بھی کمیٹی میں شامل ہیں.
کمیٹی سیاسی انتشار سے بچنے کے لیے اپوزیشن سے مذاکرات کرے گی، کمیٹی کو مذاکرات کا مکمل اختیار دے دیا گیا ہے