جاوید میانداد کا ایل او سی دورے کا اعلان

کراچی (الصفوت نیوز)سابق کپتان جاوید میانداد نے کشمیریوں کے ساتھ اظہار یکجہتی کے لیے ایل او سی کا دورہ کرنے کا اعلان کردیا۔تفصیلات کے مطابق سابق کپتان قومی کرکٹ ٹیم جاوید میانداد نے کشمیریوں کے ساتھ اظہار یکجہتی کے لیے لائن آف کنٹرول کے دورے کا اعلان کرتے ہوئے کہا کہ امن کا پیغام لے کر جاؤں گا۔جاوید میانداد نے اپنے ویڈیو پیغام میں کھیل اور سیاست سے وابستہ شخصیات کو ساتھ چلنے کی دعوت دی۔لیجنڈ کرکٹر کا کہنا تھا کہ ظلم و ستم کا نشانہ بننے والے کشمیریوں سے اظہار یکجہتی کے لیے احتجاج کروں گا، دنیا کی توجہ مقبوضہ کشمیر پر ہونے والے مظالم کی جانب کروانا چاہتا ہوں۔جاوید میانداد نے کہا کہ جو میرے ساتھ چلنا چاہتا ہے، آئے ساتھ چلے، کشمیریوں کی جدوجہد کبھی ختم نہیں ہوسکتی، دنیا میں نئے ملک بنتے رہیں گے، جس طرح پاکستان کو بننے سے کوئی نہیں روک سکا، اسی طرح کشمیر کو آزاد ہونے سے کوئی نہیں روک سکتا۔